വ്യാഹൃത്യാവീതശക്തിജ്വലനപുരയുഗദ്വന്ദ്വസംധ്യുത്ഥശക്ത്യാ-

വീതം കോണാത്തദുര്ബീജകമനു ച കപോലാത്തഗായത്രിമന്ത്രമ്.

ആഗ്നേയാവീതമര്ണൈര്വൃതമനുവിഗതൈര്ഭൂപുരാഭ്യാം ച രന്ധ്രേ
ക്ഷ്ത്രൌംചിന്താരത്നകം ദ്വാദശഗുണിതമിദം യന്ത്രമിഷ്ടാര്ഥദായി৷৷10.2৷৷

ദ്വാദശമധ്യമവര്തുല-

രേഖാ ബഹിരാലിഖേച്ച ശക്തീനാമ്.

ഹരിയമവരുണധനാധിപ-
ദിക്ഷു ദ്വേ ദ്വേ ച താഃ ക്രമേണ സ്യുഃ৷৷10.4৷৷

മണ്ഡലയുഗയുഗലം സ്യാ-

ദസ്പൃശദാന്തരിതവര്തുലം വിശദമ്.

ശക്തിം പ്രവേഷ്ടയേച്ച
പ്രതിലോമവ്യാഹൃതീഭിരന്തഃസ്ഥാമ്৷৷10.6৷৷

ഗായത്രീം പ്രതിലോമതഃ പ്രവിലിഖേദഗ്നേഃ കപോലം ബഹി-

ര്ദ്വേ ദ്വേ ചൈവ ലിപീ ബഹിശ്ച രചയേദ്ഭൂയസ്തഥാ ത്രിഷ്ടുഭമ്.

വര്ണാന്പ്രാനുഗതാംശ്ച ഭൂപുരയുഗേ സിംഹാഖ്യചിന്താമണിം
ലിഖ്യാദ്യന്ത്രമശേഷദുഃഖശമനായോക്തം പുരാ ദേശികൈഃ৷৷10.8৷৷

ആദാവങ്ഗാവരണമനു ഹൃല്ലേഖികാദ്യാശ്ചതസ്രോ

ബ്രഹ്മാണ്യാദ്യാഃ ഷോഡശവികൃതിദ്വന്ദ്വസംഖ്യാക്രമേണ.

മാര്ധം ഭൂയശ്ചതസൃഭിരഥോ ഷഷ്ടിഭിര്ലോകപാലൈ-
ര്വജ്രാദ്യൈരഷ്ടമമപി സമഭ്യര്ചയേദ്ഭക്തിനമ്രഃ৷৷10.10৷৷

ശ്രദ്ധാ മേധാ മതിഃ കാന്തിരാര്യാ ഷോഡശ ശക്തയഃ.
വിദ്യാഹ്രീപുഷ്ടയഃ പ്രജ്ഞാ സിനീവാലീ കുഹൂസ്തഥാ৷৷10.12৷৷

വികൃതിര്ദണ്ഡിമുണ്ഡിന്യൌ സേന്ദുഖണ്ഡാ ശിഖണ്ഡിനീ.
നിസുമ്ഭസുമ്ഭമഥനീ മഹിഷാസുരമര്ദിനീ৷৷10.14৷৷

അമ്ബികാ ഹ്ലാദിനീ ചൈവ ദ്വാത്രിംശച്ഛക്തയോ മതാഃ.
പിങ്ഗലാക്ഷീ വിശാലാക്ഷീ സമൃദ്ധിര്വൃദ്ധിരേവ ച৷৷10.16৷৷

സുരൂപാ ബഹുരൂപാ ച സ്കന്ദമാതാച്യുതപ്രിയാ.
വിമലാ സാമലാ ചൈവ അരുണീ വാരുണീ തഥാ৷৷10.18৷৷

ദേവമാതാ ഭഗവതീ ദേവകീ കമലാസനാ.
ത്രിമുഖീസപ്തമുഖ്യൌ ച സുരാസുരവിമര്ദിനീ৷৷10.20৷৷

പുനര്ഗഗനവേഗാഖ്യാ വേഗാ ച പവനാദികാ.
ഭൂയോ ഭുവനവേഗാഖ്യാ തഥൈവ മദനാതുരാ৷৷10.22৷৷

അക്ഷോഭ്യാസത്യവാദിന്യൌ വജ്രരൂപാ ശുചിവ്രതാ.
വരദാ ചൈവ വാഗീശീ ചതുഃഷഷ്ടിഃ പ്രകീര്തിതാഃ৷৷10.24৷৷

വിധാനമേതത്സകലാര്ഥസിദ്ധി-

കരം പരം പാവനമിന്ദിരാഢ്യമ്.

ആയുഷ്കരം വശ്യകരം രിപൂണാം
പ്രധ്വംസനം മുക്തിഫലപ്രദം ച৷৷10.26৷৷

അഷ്ടാശാത്താര്ഗലാവിര്ഹഗലയവരഗാച്പൂര്വപാശ്ചാത്ത്യഷട്കം

കോഷ്ഠോദ്യത്സാങ്ഗസാഷ്ടാക്ഷരയുഗയുഗലാഷ്ടാക്ഷരാഖ്യം ബഹിശ്ച.

മായോപേതാത്മയുഗ്മസ്വരമിലിതലസത്കേസരം സാഷ്ടപത്രം
പദ്മം തന്മധ്യവര്തിത്രിതയപരിലസത്പാശശക്ത്യങ്കുശാര്ണമ്৷৷10.28৷৷

പ്രാക്പ്രത്യഗര്ഗലേ ഹല-

മഥ പുനരാഗ്നേയമാരുതേ ച ഹയമ്.

ദക്ഷോത്തരേ ഹവാര്ണം
നൈഃഋതശൈവേ ഹരം ദ്വിപങ്ക്തി ലിഖേത്৷৷10.30৷৷

കോഷ്ഠേഷു ഷോഡശസ്വഥ

ഷോഡശവര്ണം തഥാ മനും മന്ത്രീ.

പദ്മസ്യ കേസരേഷ്വഥ
യുഗസ്വരാത്മാന്വിതാം തഥാ മായാമ്৷৷10.32৷৷

അനുലോമവിലോമഗതൈഃ

പ്രവേഷ്ടയേദക്ഷരൈശ്ച തദ്ബാഹ്യേ.

തദനു ഘടേന സരോജ-
സ്ഥിതേന തദ്വക്ത്രകേമ്ബുജം ച ലിഖേത്৷৷10.34৷৷

പാശശ്രീശക്തിസ്വര-

മന്മഥശക്തീന്ദിരാങ്കുശാശ്ചേതി.

ഏകം കാമിനിരഞ്ജിനി
ഠദ്വയമപരം ത്വിഹാഷ്ടവര്ണം സ്യാത്৷৷10.36৷৷

ഇതി കൃതദലസുവിഭൂഷിത-

മതിരുചിരം ലോകനയനചിത്തഹരമ്.

കൃതോജ്ജ്വലം മണ്ഡലമപി
പീഠാദ്യം പുരേവ പരിപൂജ്യ৷৷10.38৷৷

ഏവം സംപൂജ്യ ദേവീം കലശമനുശുഭൈര്ഗന്ധപുഷ്പാദികൈസ്താ-

ന്ദധ്യാജ്യക്ഷൌദ്രസിക്തൈസ്ത്രിശതമഥ പൃഥഗ്ദുഗ്ധവീരുത്സമിദ്ഭിഃ.

ഹുത്വാ ദത്വാ സുവര്ണാംശുകപശുധരണീര്ദക്ഷിണാര്ഥം ദ്വിജേഭ്യഃ
സംപൂജ്യാചാര്യവര്യം വസുഭിരമലധീഃ സംയതാത്മാഭിഷിഞ്ചേത്৷৷10.40৷৷

ജപേച്ചതുര്വിംശതിലക്ഷമേവം

സുയന്ത്രിതോ മന്ത്രവരം യഥാവത്.

ഹവിഷ്യഭോജീ പരിപൂര്ണസംഖ്യേ
ജപേ പുനര്ഹോമവിധിര്വിധേയഃ৷৷10.42৷৷

ഗുരുമപി പരിപൂജ്യ കാഞ്ചനാദ്യൈ-

ര്ജപതി ച മന്ത്രമഥോ സഹസ്രമാത്രമ്.

ഭജതി ച ദിനശോമുമര്ചനായാം
വിധിവിഹിതം വിധിമാദരേണ ഭൂയഃ৷৷10.44৷৷

ഗജമൃഗമദകാശ്മീരൈ-

ര്മന്ത്രിതമഃ സുരഭിരോചനോപേതൈഃ.

വിലിഖേദലക്തകരസാ-
ലുലിതൈര്യന്ത്രാണി സകലകാര്യാര്ഥീ৷৷10.46৷৷

ഏഭിര്വിധാനൈര്ഭുവനേശ്വരീം താം

സമര്ചയിത്വാഥ ജപംശ്ച മന്ത്രീ.

സ്തുത്യാനയാഭിഷ്ടുവതാം സമഗ്ര-
പ്രീത്യൈ സമസ്താര്തിവിഭഞ്ജികായാഃ৷৷10.48৷৷

സ്തുതിര്വാക്യബദ്ധാ പദാത്മൈവ വാക്യം

പദം ത്വക്ഷരാത്മാക്ഷരസ്ത്വം മഹേശി.

ധ്രുവം ത്വാം ത്വമേവാക്ഷരൈസ്ത്വന്മയൈസ്തോ-
ഷ്യസി ത്വന്മയീ വാക്പ്രവൃത്തിര്യതഃ സ്യാത്৷৷10.50৷৷

നമസ്തേ സമസ്തേശി ബിന്ദുസ്വരൂപേ

നമസ്തേ രവത്വേന തത്ത്വാഭിധാനേ.

നമസ്തേ മഹത്ത്വം പ്രപന്നേ പ്രധാനേ
നമസ്തേ ത്വഹംകാരതത്ത്വസ്വരൂപേ৷৷10.52৷৷

നമഃ ശ്രോത്രചര്മാക്ഷിജിഹ്വാഖ്യനാസാ-

സവാക്പാണിപത്പായുസോപസ്ഥരൂപേ.

മനോബുദ്ധ്യഹംകാരചിത്തസ്വരൂപേ
വിരൂപേ നമസ്തേ വിഭോ വിശ്വരൂപേ৷৷10.54৷৷

ചതുര്വക്ത്രയുക്താ ലസദ്ധംസവാഹാ

രജഃ സംശ്രിതാ ബ്രഹ്മസംജ്ഞാം ദധാനാ.

ജഗത്സൃഷ്ടികാര്യം ജഗന്മാതൃഭൂതേ
പരം തത്പദം ധ്യായസീശി ത്വമേവ৷৷10.56৷৷

ജടാബദ്ധചന്ദ്രാഹിഗങ്ഗാ ത്രിണേത്രാ

ജഗത്സംഹരന്തീ ച കല്പാവസാനേ.

തമഃ സംശ്രിതാ രുദ്രസംജ്ഞാം ദധാനാ
വഹന്തീ പരശ്വക്ഷമാലേ വിഭാസി৷৷10.58৷৷

ലസച്ചക്രശങ്ഖാ ചലത്ഖങ്ഗഭീമാ

നദത്സിംഹവാഹാ ജ്വലത്തുങ്ഗമൌലിഃ.

ദ്രവദ്ദൈത്യവര്ഗാ സ്തുവത്സിദ്ധസംഘാ
ത്വമേവേശി ദുര്ഗാ വിസര്ഗാവിഹീനേ৷৷10.60৷৷

ലസത്കൌസ്തുഭോദ്ഭാസിതേ വ്യോമനീലേ

വസന്തീ ച വക്ഷഃസ്ഥലേ കൈടഭാരേഃ.

ജഗദ്വല്ലഭാം സര്വലോകൈകനാഥാം
ശ്രിയം താം മഹാദേവ്യഹം ത്വാമവൈമി৷৷10.62৷৷

സമുദ്യദ്ദിവാകൃത്സഹസ്രപ്രഭാസാ

സദാ സംതതാശേഷവിശ്വാവകാശേ.

ലസന്മൌലിബദ്ധേന്ദുരേഖേ സപാശാ-
ങ്കുശാഭീത്യഭീഷ്ടാത്തഹസ്തേ നമസ്തേ৷৷10.64৷৷

ഹരേ ബിന്ദുനാദൈഃ സശക്ത്യാഖ്യശാന്തൈ-

ര്നമസ്തേസ്തു ഭേദൈഃ പ്രഭിന്നൈരഭിന്നേ.

സദാ സപ്തപാതാലലോകാചലാബ്ധി-
ഗ്രഹദ്വീപധാതുസ്വരാദിസ്വരൂപേ৷৷10.66৷৷

മനോവൃത്തിരസ്തു സ്മൃതിസ്തേ സമസ്താ

തഥാ വാക്പ്രവൃത്തിഃ സ്തുതിഃ സ്യാന്മഹേശി.

ശരീരപ്രവൃത്തിഃ പ്രണാമക്രിയാ സ്യാ-
ത്പ്രസീദ ക്ഷമസ്വ പ്രഭോ സംതതം മേ৷৷10.68৷৷