व्याहृत्यावीतशक्तिज्वलनपुरयुगद्वन्द्वसंध्युत्थशक्त्या

वीतं कोणात्तदुर्बीजकमनु च कपोलात्तगायत्रिमन्त्रम्।

आग्नेयावीतमर्णैर्वृतमनुविगतैर्भूपुराभ्यां च रन्ध्रे
क्ष्त्रौंचिन्तारत्नकं द्वादशगुणितमिदं यन्त्रमिष्टार्थदायि।।10.2।।

द्वादशमध्यमवर्तुल

रेखा बहिरालिखेच्च शक्तीनाम्।

हरियमवरुणधनाधिप
दिक्षु द्वे द्वे च ताः क्रमेण स्युः।।10.4।।

मण्डलयुगयुगलं स्या

दस्पृशदान्तरितवर्तुलं विशदम्।

शक्तिं प्रवेष्टयेच्च
प्रतिलोमव्याहृतीभिरन्तःस्थाम्।।10.6।।

गायत्रीं प्रतिलोमतः प्रविलिखेदग्नेः कपोलं बहि

र्द्वे द्वे चैव लिपी बहिश्च रचयेद्भूयस्तथा त्रिष्टुभम्।

वर्णान्प्रानुगतांश्च भूपुरयुगे सिंहाख्यचिन्तामणिं
लिख्याद्यन्त्रमशेषदुःखशमनायोक्तं पुरा देशिकैः।।10.8।।

आदावङ्गावरणमनु हृल्लेखिकाद्याश्चतस्रो

ब्रह्माण्याद्याः षोडशविकृतिद्वन्द्वसंख्याक्रमेण।

मार्धं भूयश्चतसृभिरथो षष्टिभिर्लोकपालै
र्वज्राद्यैरष्टममपि समभ्यर्चयेद्भक्तिनम्रः।।10.10।।

श्रद्धा मेधा मतिः कान्तिरार्या षोडश शक्तयः।
विद्याह्रीपुष्टयः प्रज्ञा सिनीवाली कुहूस्तथा।।10.12।।

विकृतिर्दण्डिमुण्डिन्यौ सेन्दुखण्डा शिखण्डिनी।
निसुम्भसुम्भमथनी महिषासुरमर्दिनी।।10.14।।

अम्बिका ह्लादिनी चैव द्वात्रिंशच्छक्तयो मताः।
पिङ्गलाक्षी विशालाक्षी समृद्धिर्वृद्धिरेव च।।10.16।।

सुरूपा बहुरूपा च स्कन्दमाताच्युतप्रिया।
विमला सामला चैव अरुणी वारुणी तथा।।10.18।।

देवमाता भगवती देवकी कमलासना।
त्रिमुखीसप्तमुख्यौ च सुरासुरविमर्दिनी।।10.20।।

पुनर्गगनवेगाख्या वेगा च पवनादिका।
भूयो भुवनवेगाख्या तथैव मदनातुरा।।10.22।।

अक्षोभ्यासत्यवादिन्यौ वज्ररूपा शुचिव्रता।
वरदा चैव वागीशी चतुःषष्टिः प्रकीर्तिताः।।10.24।।

विधानमेतत्सकलार्थसिद्धि

करं परं पावनमिन्दिराढ्यम्।

आयुष्करं वश्यकरं रिपूणां
प्रध्वंसनं मुक्तिफलप्रदं च।।10.26।।

अष्टाशात्तार्गलाविर्हगलयवरगाच्पूर्वपाश्चात्त्यषट्कं

कोष्ठोद्यत्साङ्गसाष्टाक्षरयुगयुगलाष्टाक्षराख्यं बहिश्च।

मायोपेतात्मयुग्मस्वरमिलितलसत्केसरं साष्टपत्रं
पद्मं तन्मध्यवर्तित्रितयपरिलसत्पाशशक्त्यङ्कुशार्णम्।।10.28।।

प्राक्प्रत्यगर्गले हल

मथ पुनराग्नेयमारुते च हयम्।

दक्षोत्तरे हवार्णं
नैःऋतशैवे हरं द्विपङ्क्ति लिखेत्।।10.30।।

कोष्ठेषु षोडशस्वथ

षोडशवर्णं तथा मनुं मन्त्री।

पद्मस्य केसरेष्वथ
युगस्वरात्मान्वितां तथा मायाम्।।10.32।।

अनुलोमविलोमगतैः

प्रवेष्टयेदक्षरैश्च तद्बाह्ये।

तदनु घटेन सरोज
स्थितेन तद्वक्त्रकेऽम्बुजं च लिखेत्।।10.34।।

पाशश्रीशक्तिस्वर

मन्मथशक्तीन्दिराङ्कुशाश्चेति।

एकं कामिनिरञ्जिनि
ठद्वयमपरं त्विहाष्टवर्णं स्यात्।।10.36।।

इति कृतदलसुविभूषित

मतिरुचिरं लोकनयनचित्तहरम्।

कृतोज्ज्वलं मण्डलमपि
पीठाद्यं पुरेव परिपूज्य।।10.38।।

एवं संपूज्य देवीं कलशमनुशुभैर्गन्धपुष्पादिकैस्ता

न्दध्याज्यक्षौद्रसिक्तैस्त्रिशतमथ पृथग्दुग्धवीरुत्समिद्भिः।

हुत्वा दत्वा सुवर्णांशुकपशुधरणीर्दक्षिणार्थं द्विजेभ्यः
संपूज्याचार्यवर्यं वसुभिरमलधीः संयतात्माभिषिञ्चेत्।।10.40।।

जपेच्चतुर्विंशतिलक्षमेवं

सुयन्त्रितो मन्त्रवरं यथावत्।

हविष्यभोजी परिपूर्णसंख्ये
जपे पुनर्होमविधिर्विधेयः।।10.42।।

गुरुमपि परिपूज्य काञ्चनाद्यै

र्जपति च मन्त्रमथो सहस्रमात्रम्।

भजति च दिनशोऽमुमर्चनायां
विधिविहितं विधिमादरेण भूयः।।10.44।।

गजमृगमदकाश्मीरै

र्मन्त्रितमः सुरभिरोचनोपेतैः।

विलिखेदलक्तकरसा
लुलितैर्यन्त्राणि सकलकार्यार्थी।।10.46।।

एभिर्विधानैर्भुवनेश्वरीं तां

समर्चयित्वाथ जपंश्च मन्त्री।

स्तुत्यानयाभिष्टुवतां समग्र
प्रीत्यै समस्तार्तिविभञ्जिकायाः।।10.48।।

स्तुतिर्वाक्यबद्धा पदात्मैव वाक्यं

पदं त्वक्षरात्माक्षरस्त्वं महेशि।

ध्रुवं त्वां त्वमेवाक्षरैस्त्वन्मयैस्तो
ष्यसि त्वन्मयी वाक्प्रवृत्तिर्यतः स्यात्।।10.50।।

नमस्ते समस्तेशि बिन्दुस्वरूपे

नमस्ते रवत्वेन तत्त्वाभिधाने।

नमस्ते महत्त्वं प्रपन्ने प्रधाने
नमस्ते त्वहंकारतत्त्वस्वरूपे।।10.52।।

नमः श्रोत्रचर्माक्षिजिह्वाख्यनासा

सवाक्पाणिपत्पायुसोपस्थरूपे।

मनोबुद्ध्यहंकारचित्तस्वरूपे
विरूपे नमस्ते विभो विश्वरूपे।।10.54।।

चतुर्वक्त्रयुक्ता लसद्धंसवाहा

रजः संश्रिता ब्रह्मसंज्ञां दधाना।

जगत्सृष्टिकार्यं जगन्मातृभूते
परं तत्पदं ध्यायसीशि त्वमेव।।10.56।।

जटाबद्धचन्द्राहिगङ्गा त्रिणेत्रा

जगत्संहरन्ती च कल्पावसाने।

तमः संश्रिता रुद्रसंज्ञां दधाना
वहन्ती परश्वक्षमाले विभासि।।10.58।।

लसच्चक्रशङ्खा चलत्खङ्गभीमा

नदत्सिंहवाहा ज्वलत्तुङ्गमौलिः।

द्रवद्दैत्यवर्गा स्तुवत्सिद्धसंघा
त्वमेवेशि दुर्गा विसर्गाविहीने।।10.60।।

लसत्कौस्तुभोद्भासिते व्योमनीले

वसन्ती च वक्षःस्थले कैटभारेः।

जगद्वल्लभां सर्वलोकैकनाथां
श्रियं तां महादेव्यहं त्वामवैमि।।10.62।।

समुद्यद्दिवाकृत्सहस्रप्रभासा

सदा संतताशेषविश्वावकाशे।

लसन्मौलिबद्धेन्दुरेखे सपाशा
ङ्कुशाभीत्यभीष्टात्तहस्ते नमस्ते।।10.64।।

हरे बिन्दुनादैः सशक्त्याख्यशान्तै

र्नमस्तेऽस्तु भेदैः प्रभिन्नैरभिन्ने।

सदा सप्तपाताललोकाचलाब्धि
ग्रहद्वीपधातुस्वरादिस्वरूपे।।10.66।।

मनोवृत्तिरस्तु स्मृतिस्ते समस्ता

तथा वाक्प्रवृत्तिः स्तुतिः स्यान्महेशि।

शरीरप्रवृत्तिः प्रणामक्रिया स्या
त्प्रसीद क्षमस्व प्रभो संततं मे।।10.68।।